Sara Hpungwung Tang Gun (Sau Kamai) a tsuhtat shiga

Sara Hpauwung Tang Gun (Sau Kamai)

Jinghpaw Wunpawng amyu sha ni a Laika ka sara kaba, Sara Hpauwung Tang Gun (Sau kamai) gaw Gutung ta 5, 2012 ning October shata 19 ya (Hpan) shani shana daw hkying 4:00 ten hta Myitkyina, Mung shawa tsi-rung kaba kaw Madu Yesu hta yup pyaw mat wa sai lam chye lu ai.

Sara Hpauwung Tang Gun (Sau kamai) hpe 1951 ning September shata 29 ya shani Sumprabum mare kaw Hkahku mung sasana (Hkalup sasana) sara, Sara kaba Maran Yawshu hte Saranum Langnaw Kaw yan kaw nna shangai chyaihkai ai re. Kaji ten hta Myitkyina St. Paul (Engalican sasana jawng), ya na masat (5) lahta tsang jawng (Myitkyina) kaw tsang 6 du hkra hpaji sharin hkaja lai wa sai. Daihpang Shanglawt rawt malan a majaw Kahpu Bawk (Du Bawk Di) nta masha ni yawng hpe rawt malan ginra de woi la hkrum ai majaw tsang jawng hpe matut sharin hkaja n lu mat ai. Raitim, Kawa Sara kaba Maran Yawshu gaw kasha ni hpe du ai shara kaw Maths, English, History, Geography hpaji ni hpe sharin ya ai lam chye lu ai. Ndai zawn kawa a lata hta hpaji ni hpe matut sharin hkaja la ai majaw Sara Hpauwung Tang Gun (Sau kamai) gaw English laika hpe grai ram ai hku chye hti, chye ka lu ai hpe mu lu ai.

Sara Hpauwung Tang Gun (Sau kamai) gaw Dainai, Awnglawt mare na Shanglawt Asuya jawng hta Jawng sara hte Jawng up magam bungli hpe 10 ning jan gunhpai lai wa nna, Sinna ginwang ginjaw hta matut magam gun lai wa ai hpe chye lu ai. Bai Ginjaw Shi Sumla makan dap hta mung aten na na magam gun lai wa nna, KIO hte Myen asuya gaphkat jahkring lam galaw wa ai hpang Namti Jumdwi jak kaw rung up magam hpe gunhpai lai wa nna, Wunpawng Mungdan Shanglawt Asuya magam bungli kaw na pru hkring-sa ahkang hte hkring-sa nna , nta masha ni hpe lam woi nga ai re.

Ndai zawn, Wunpawng Mungdan Shanglawt Asuya magam bungli kaw nna pru hkring sa ai hpang Amyu sha laili laika hpe madung tawn nna, sawk sagawn ka shapraw nga ai sara kaba langai re.

Sara Hpauwung Tang Gun (Sau kamai) gaw ningka mying amyu myu hte English, Myen, Jinghpaw laika ni hte Ga shagawp, sumrai, sumroi, labau laika ni law law hpe Megazin, Journal, laika hpan hkum hta ka nga ai laika ka sara langai mi rai nga ai.

Sara Hpauwung Tang Gun (Sau kamai) a grau laklai ai lam gaw Jinghpaw ga-si ga-ngau ni hpe saw shagawn ka shapraw ai lam hta grai mying kaba ai hte sawk ka shapraw ai lam re. Ya ten du hkra mung, Jinghpaw – Myen – English dictionary ka shalat nga ai komiti hta amu madu lit la nna shakut nga ai sara langai mi re.

Sara Hpauwung Tang Gun (Sau kamai) ka shapraw ai laika ni hta mying kaba ai laika ni gaw Laisai Tsaban laman a Jiwa ni arawng ningsang (I)(II) hte N nga mat sai, Dr. Nlam Awng a lam hpe ka shalat da ai N-gaw N-wai ai myipwi hte kaga mabyin sumrai ni ngu ai laika buk ni rai nga ai.

Sara Hpauwung Tang Gun (Sau Kamai)

Sara Hpauwung Tang Gun (Sau kamai) gaw kashu marai (7) a kaji re lam mung chye lu ai.

Sara Hpauwung Tang Gun (Sau kamai) Gutung ta 5, 2012 ning October shata 19 ya (Hpan) shani shana daw  hta Myitkyina, Nawngnang modo lam kaw cycle accident byin nna Myikyina mung shawa tsi rung kaw Madu Yesu hta yup pyaw mat wa sai hte shi a moimang hpe 2012 ning October 21 (Majoi) ya shani hkying 4:00 PM ten hta Myitkyina, Dumare, Machyukawng lawk Dk-549 kaw nna Myitkyina, Nawngnang, Jinghpaw Wunpawng Lupding Lupra hta makoi mayan na re lam chye lu ai.

N nga mat sai, Sara Hpauwung Tang Gun (Sau kamai)  hpe anhte Kachinlandnews media kaw nna mung shagrau masat dat ai hte ngam nga ai jinghku jing-yu nta masha ni rau yawn hkyen lawm nga ga ai.

Related posts