Jinghpaw Mung kata majan matut manoi byin nga

KIO uphkang ginra kata Myen asuya hpyendap hte majan matut manoi byin nga ai lam chye lu ai.

Guptung ta praw (3), 2012 ning October shata 17 (Dam) ya shani, Sumprabum ginwang kata kaw KIA masat (4) dapdung ni hte Myen asuya hpyendap, Dingdung hpyen ginra daju (N – RMC) kata na Danai lam Dumbang kaw dapjung da ai, LIB (298) na hpyenhpung ni gasat poi byin ai lam chye lu ai. Gasat poi kata na si hkalaq jahpan hpe hkrak tup n chye lu shi ga ai.

Bai, Guptung ta praw (3), 2012 ning October shata 17 (Dam) ya shani, jahpawt daw hkying 9:30 daram hta Lawhkawng ginwang, Miwa jarit lahta masat shadaw masat (6) mayan kaw KIA masat (32) dapdung hpyenhpung ni hte Myen asuya hpyendap, Magwe hkridun LID (88) npu na Magwe –  Yenanchaung kaw dap jung ai, LIB (77) na hpyenhpung ni gasat poi byin ai lam chye lu ai. Ndai gasat poi hta Myen asuya hpyendap na hpyenla mang (3) mu tam ai lam hte kade hkalaq hkrum nna, kade si mat ai hkrak n chye shi ai lam KIA shawnglam shiga kawn chye lu ai. KIA maga hpyen hpyenla langai mi lata lahpum kaw katset hkra hkalaq ai lam hpe mung chye lu ai.

Guptung ta praw (3), 2012 ning October shata 17 (Dam) ya shani hta sha KIO ginjaw ginra, Dawhpum-yang ginwang kata, Mansai, Ting-jang mare grup-yin hta KIA masat (24) dapdung hpyenhpung ni hte Myen asuya hpyendap,Manmaw hkridun MOC – 21 npu na LIR (32o), LIB (56) dapdung ni pawng ai hpyenhpung ni hte gasat poi byin ai lam matut chye lu ga ai.

Matut nna mung, Guptung ta praw (3), 2012 ning October shata 17 (Dam) ya shani hta Myen asuya hpyendap, Mogaung hkridun MOC – 3 npu na LIR (386) na hpyenhpung ni hte KIA ginjaw shimlam hpyenhpung ni Laiza – Myitkyina mawdaw lam, Namsan-yang mare makau kaw gasat poi byin ai lam chye lu ga ai. Ndai zawn gasat poi byin ai ten hta, Myen asuya hpyendap, Dumbang bum kaw nna AA gun sinat kaba ni, Gangdau-yang kaw dapjung nga ai Amyawk dap (387) ni mung 105mm amyak kaba ni hte gap bun ai majaw mung mare masha ni a dumsu nga ni si hkrum mat ai lam mung matut chye lu ga ai.

Myen asuya kaw nna, KIO hpe simsa lam bawngban na matu laika shana wa ai majaw, KIO kaw nna mung bawngban hpawng hpe matut galaw sa lu na matu laika bai htang shana hkat nga ai ten hta Myen asuya hpyendap ni gaw KIO uphkang ginra ni de laja lana htim gasat chyinglau nga ai lam re hpe mung mu lu ai.