Myen Asuya Hpyenla ni, Buga madu masha ni hpe gawt

Dabak

October 2, 2011 ya shani hta Myitkyina muklum kaw na tinang a dum nta de bai wa ai Dabak mare kaw na Salang Lawhpyu Zau Bawk hpe Myen asuya, hpyendap gaw zingri adup ai lam chye lu ai.

Dabak hka mahkrai pawt (Katsu mare hkran) kaw dap jung ai Waimaw mare hkri-dun LIB (58) Major Ye Min Twe woi awn ai hpyen hpung hte LIR (318) Major Awng That Zaw woi awn ai hpyen hpung ni gaw mungchying masat hkap jep ai lam galaw ai.

Mungchying masat hpe shaw madun tim, hpyendap kata de shaga bang nhtawm adup abyen, htawng, bye ai  hte (3) ya tup zingri zingrat wa sai re. Dai hpang, Dabak mare e hkum nga sa, ngu sadi jaw nna gawt ai majaw Salang Lawhpyu Zau Bawk hte dum nta masha ni gaw October 5, 2011 ya jahpawt hta Myitkyina muklum de hprawng yen mat ai lam chye lu ai.

Dabak mare kaw matut n nga na matu jahkrit sadi jaw ai lam gaw hpa majaw re hpe tup hkrak n chye lu ai hta n-ga, Myen hpyendap kaw na mung tsun sanglang ai lam n nga ai.