Myen Asuya, Hpyenla ni Lahta Sammung na mare nkau hpe zing-ri

Nat hkrum ai Nga Wulawng

Myen asuya, Hpyendap LIB (241) ni, Lahta Sammung, Huhpyet mare makau na, KIO Dingda Ginwang Ginjaw a Hpaudawq mare kaw jung da ai,KIO Buga Gaw Sharawt rung hpe 14 September 2011 (Dam) ya shani sa hpya jahten ya ai lam chye lu ai. Bai, dai rung makau na Sam amyu Slg. Aik Sam Jing hte nta masha ni hpe shaga nna, rim adup zing-ri ai hte nta kata na n-gu bye (5), U kanu (6), Gumhpraw (ks. 10,000/-), Hkre-di, Gyepdin hte laga arung arai ni kashun zing la ya ai lam mung chye lu ai.

Myen asuya, Hpyenla ni adut zing-ri ai hta Slg. Aik Sam Jing a kanam mahkum hte re ai Jan. Aye Gya gaw ndaizawn zing-ri hkrum ai majaw ya ten, garai machyi sawng nga ai lam hpe mung chye lu ai. Bai, Myen asuya hpyenla ni gaw Hpaudawq mare na Slg. Sang Chyaw a nga ulawng hpe mung KIA a sinat laknak ni makoi da ai shara re nga nna, tam sawk yu n mu ai hpang, nat kau da ya ai lam mung chye lu ga ai. Mare nga rem sha ai, Slg. Aik Ngin a dum nta shatai ai Yi-wa hpe mung nat kau ya ai hte mare na wa, nga ni hpe mung gap sat sha ai lam chye lu ga ai. Bai, Huhpyet mare na Ma shalet jawng saranum langai mi a gumhpraw (ks. 90,000/-) hpe mung gareq kashun la ya ai lam mung nga ai hpe chye lu ai.

Nat hkrum ai Yi-wa
KIO, Hpaudawq Buga Gawsharawt rung