KIA, Masat (4) Dapba ginra na mare kahtawng ni hpe jahkrit shama na hkyen nga

Laiwa sai August 2011 shata laman hta Muse – Mandalay lam lapran kaw Myen Asuya, Hpyendap ni 4-5 lang KIA,hpyenla ni a hkap gap ai lam hkrum sha lai wa ai majaw ndai laman sha Myen Ausya, Hpyenla ni masha n-gun hkying lam shimlam la sin nga ai lam chye lu ai. Ndai zawn Muse – Mandalay lam hpe shimlam la ai hta sha n-ga lam ding-yang na mare ni hpe mung atik anang htawt sit kau shangun nga ai lam mung chye lu ga ai.

2 September 2011 (Hpan) ya shani hta Muse muklum kata na Myen Asuya uphkang rung ni yawng n sa n mai zuphpawng nna, Muse deng 105 mare kaw nna KIA, masat (4) Dapba shawnglam post jahkrat ai makau na mare ni du hkra de, masha jahpan hta ai lam galaw sa wa na matu matsun hkat ai lam hpe chye lu ai. Ndai zawn Myen Asuya Uphkang rung ni masha jahpan hta shinggyin sa wa na hta Myen Asuya, hpyenla marai (100), Ninggawn Hpyenhpung na hpyenla marai (30) hte Muse muklum kata Myen Asuya uphkang rung shagu na marai (2) hpra n-gun hte 5 September 2011 (But) shani kaw nna jep hkawm na re lam hpe chye lu ga ai.

Myen asuya, rung na magam gun ni gaw ndai zawn hkawmsa na hta hkannang na matu n kam nga ai lam mung Myen asuya magam gun rung masha ni kaw nna na lu ai. Daihta, KIA, Dapba (4) kaw nna mung ndai zawn Myen asuya, hpyenhpung ni tinang uphkang ginra de tawt shang wa yang hkap gap na matu jin jin rai nga sai lam hte mung mare masha ni hte Myen asuya rung magam gun ni hpe Myen Asuya hpyenhpung ni rau n hkawm kanawng na matu mung sadi jaw da nga ai.