Hkrit Hpa Simsa Lam

Ya hkyak hkyak KIO/KIA ningbaw ningla ni simsa lam hte seng nna grai maja ra na re, hpa majaw nga yang, dai daram shanhte myen ni a hpyenla du kaba ni hpe gap sat kau ya ai hpe wa shanhte hku nna grai shagrit shanem let anhte hte simsa lam galaw ga ngu lajin wa ai gaw myit yu hpa re, shi a hpyendu hpyenma dai daram sat kau ya sai KIA hpe myit sanseng ai hte simsa lam galaw ga ngu lajin wa ai gaw grai myit yu hpa re, grai kabu let myitdik nna sharawng shara hte simsa mayu ai gaw n rai na re.

Hpamajaw nga yang, gap hkat nga magang shanhte a mung masa hkrat sum wa magang rai nga sai majaw, anhte hpe si mani ai hku nna shaga la nhtawm langai hpang langai shakrip kau na masing she rai na re, 2009 ning hta Sam ningbaw langai hpe simsa lam la nga ai aten Tawngjii muklum, shi a nta kaw nga nga yang hkre hkre sa nna sa gap sat kau ya ma ai hte Kayin ninggawn amu madu (1) Badu Man Sha hpe mung daizawn Htai mung rung nta kaw hkre hkre sa gap sat kau ya wa masai, dai ni hpe yu yang, ya Myen ni simsa lam galaw ga ngu ai lam gaw shanhte grai myit dik laq na saw taw nga ai n re, anhte a ningbaw ni hpe langai hpang langai shatsai kau mayu ai majaw, hte mung masa hku nna myiman bai lu wa na matu sha re.

Dai majaw simsa lam galaw ai gaw anhte a matu hkrit hpa mahkam de shang wa ai lam she rai na nhten, si hkam sa wa ai lam she rai na re, dai majaw anhte a ahkyak ai ningbaw ningla ni ndai lam hpe grai maja, myit sumru yu, kyuhpyi let she shawng de sit sa ga ngu ngai hku nna tang madun dat ai.Ya yang gap hkat ai lam hpe rai n mai jahkring shi na re, dai gaw shanhte a mung masa policy hpe agrip shanem ya ai lam langai rai nga ai majaw matut manoi gap let bawngban sa wa yang she mai na re.

Amyu kaji ni Munghpawm kaw na garan pru na hpe Awng San Kaw mung grai myit tsang nga sai, hpa majaw nga yang amyu kaji ni garan pru mat jang shanhte NLD ni mung hpa na Myen mungdan hta mung masa galaw na lam n nga sai, shanhte Myen shada ga law ai lam sha rai mat sai, Suu Kyi mung shi uphkang na shara n nga wa, kaji wa na hpe grai tsang wa nga ai. Nhprang rai law malawng pru ai hte panglai hkinggau, lamu ga jarik ni mung amyu bawsang kaji ni a shara ni hta re. Dai majaw amyu kaji bawsang ni munghpawm kaw na garan pru mat yang shanhte a Myen mung gaw lani mi/lana mi hta sha grai matsan mat na re, dai hpe mi kaw na,  Awng San wa mung dum hprang ai majaw munghpawm n lu lu hkra galaw shakut ai re.

Dai majaw Myen gaw Myen sha re, Awng San Kaw hpe mung n mai kam ai, maigan du Myen ni yawng mung langai sha re, munghpawm naw hpawm nna anhte grai naw ba na malai, ya aten masa hkrak nga ai ten garan pru na lam de shanang sa wa yang grau mai na nhten?, anhte hkrai san san re mungdan hpe ya mung naw mai gawgap nga ai, gasat di la yang pyi lu na masa re, dai majaw matut manoi amyu sha ni hpe Awmdawm Shanglawt ai de she woi sa wa marit ngu ngai hpung magam gun langai wa hku nna lajin laroi ai hte ndai hte wa tang shawn dat ai.

Shingran Brang

Lahta na ningmu gaw laika ka ai wa a ningmu san san rai nna, kachinlandnews kaw nna matut htawn shana shabra ai lam sha re hpe chye na shangun mayu ga ai.